Зэрэшъулъэгъоу, адыгэхэм яхэгъэгу, диаспорэм, нахьыбэрэмкӏэ спортым, культурэм, бизнесым, нэмыкӏ лъэныкъохэм гъэхъагъэу ащашӏыгъэхэм тисайт нахь афэгъэхьыгъ. Тэ гухэлъэу тиӏэр адыгэхэм апсэ къэӏэтыгъэныр, ащкӏэ щыӏэныгъэм илъэныкъо пстэухэмкӏи гъэхъагъэ пшӏын зэрэплъэкӏыщтым шӏошъхъуныгъэ афытиӏэныр ары.
Загъорэ адыгэ лъэпкъым иӏофыгъо заулэмэ, ахэр зэрэзэшӏуахыщт шӏыкӏэхэм татегущыӏэ. Гущыӏэм пае, адыгабзэр пштэмэ, ар зэрэмэкӏагъэр, зэрэкӏодыжьырэр зэкӏэми ашӏэ. Блэкӏыгъэм мы ӏофтхьабзэр къызэтегъэуцогъэнымкӏэ анахь амал псынкӏэу щытыгъэр чэщи мафи теле — радио адыгабзэкӏэ гъэпсыгъэныр ары. Демократием, лъэпкъхэм яфитыныгъэхэм, цӏыфым ифитыныгъэхэм япхыгъэ шапхъэхэр зыщагъэцэкӏэрэ Европэм ихэгъэгухэм ащыщ ащ фэдэ теле-радио зэрэщыбгъэпсын фаер къэттытхыгъ.
Адыгэ телевиденэмрэ радиомрэ къызэӏухыгъэнхэ зэрэфаем фэгъэхьыгъэ тхыгъэу тиӏэм нэмыкӏэу, а ищыкӏагъэр къизыӏотыкӏырэ адыгэ дунаим зы тхыгъи зэрэтымылъэгъугъэр лъэшэу тшӏогъэшӏэгъон. Телевидением мэхьанэшхо зэриӏэр къыбгурыӏоным пае экспертэу ущытын ищыкӏагъэп. Аужыпкъэм, телевидениер зыдэщымыӏэ дунаим ащ чӏыпӏэ щыриӏэп, дунаим тет нэбгырэ пэпчъ унэм имызакъоу, имобильнэ телефониери телевизорым еплъы. Адыгабзэкӏэ къэгущыӏэрэ телевидением адыгабзэм игъэпытэнрэ ихэхъоныгъэрэ афэӏорышӏэн ылъэкӏыщт.
Загъорэ тегупщысэ: адыгэхэр ащ фэдизэу делэха, телевидением мэхьанэу иӏэр къагурыӏорым1онэу? Адыгэ теле-радио игъэпсын яуахътэрэ яахъщэрэ халъхьанэу фэмыехэу адыгэхэр ащ фэдизэу гъощагъэхэу, шъхьэзефэжьызакъо хъухэу ара?
Чэщи мафи телевидениемрэ радиомрэ адыгабзэкӏэ гъэпсыгъэнхэр адыгэ лъэпкъым хэхъоныгъэ ышӏынымкӏэ анахь пшъэрылъ шъхьаӏэу щыт. Адрэ пстэуми мэхьэнэ я1эп. Телевидениер къэбар жъугъэм иамалхэм афытегъэпсыхьагъ, зэрэдунаеу къэбарэу щызэрахьэрэм тегъэпсыхьагъ ыкӏи тэ, адыгэхэм, адыгэ телевидениерэ радиорэ дгъэпсыгъэу ащ тыхэхьан фае.
Адыгэ лъэпкъыр джыри псау, ащ инахьыбэр ежь илъэпкъ ишӏуагъэ ригъэкӏыным пылъ, дэлажьэ, цӏыф зырызхэми, купхэми, организациехэми.
Ау ахэм зэкӏэми ятэӏо тшӏоигъу чэщи мафи адыгабзэкӏэ телевидениерэ радиорэ жъугъэпсынэу шъупымылъмэ, шъукӏуачӏи, шъуиӏофшӏэни хьаулые зэрэхъущтыр. Хэтрэ цӏыфи, купи, организации мурад нахь лъагэ зыфагъэуцужьын фае ыкӏи язытет, ястатус къапкъырыкӏыхэзэ, адыгэ телевидениемрэ радиомрэ ягъэпсын кӏэщакӏо фэхъунхэ, дэлэжьэнхэ фае.
Comments
Post a Comment