Сурэтыр: Евгений Кривко/Советскэ Адыгеир
2026-рэ илъэсым адыгэ къуаем и фестиваль хэлэжьагъэхэм ящынэгъончъагъэ къэухъумэгъэн зэрэфаем епхыгъэу щагъэзыягъ. Ащ Фэгъэхьыгъэу Адыгэ Республикэм и правительствэ макъэ къыгъэӏугъ.
"Зэхэщэкӏо комитетым Унашъо ышӏыгъ Адыгэ къуаем и фестиваль 2026-рэ илъэсым амышӏынэу. Мы унашъор къызхэкӏырэр хъугъэ — шӏагъэр ыкӏи ӏофтхьабзэм игъэхьазырын хэлэжьагъэхэм, хьакӏэхэм, зэкӏэ хэлажьэхэрэм ящынэгъончъагъэ къэухъумэгъэн зэрэфаер ары», - къыщеӏо республикэм и правительствэ имэкъэгъэIу тхыгъэм.
Арэу щытми, проектыр чанэу къэнэжьы: этнопаркэу «Дегуакӏо Шъоф» зыфиӏорэм игъэпсын ӏоф дашӏэ, аужыпкъэм фестивалым ренэу ичӏыпӏэ хъущт. Адыгэ культурэр, шэн-хабзэхэр, пщэрыхьэпӏэ кӏэныр къэухъумэгъэнхэм ыкӏи зэлъягъэшӏэгъэным пае джырэ уахътэм диштэрэ чӏыпӏэ ащ къыгъэпсыщт, джащ фэдэу фестивалыр лъэгэпӏакӏэм диӏэтэещт.
Фестивалым къыдезыгъэштагъэхэм ыкӏи илъэс пчъагъэхэм къакӏоцӏ ащ хэлэжьагъэхэм зэкӏэми яӏахьэу халъхьагъэр зэхэщэкӏо комитетым хигъэунэфыкӏыгъ.
2025-рэ илъэсым фестивалым мэфитӏум къыкӏоцӏ нэбгырэ 70 000 фэдиз къырищэлӏагъ, ар рекорд къэгъэлъэгъон хъугъэ. Туризмэм хэхъоныгъэ ышӏынымкӏэ, лъэпкъ культурэр лъыгъэкӏотэгъэнымкӏэ, республикэм ищхыныгъо бренд зэлъягъэшӏэгъэнымкӏэ проектыр республикэм ихъугъэ-шӏэгъэ шъхьаӏэхэм ащыщ хъугъэ.
Comments
Post a Comment