Сурэтыр къызхэтхыгъэр: Къумпӏыл Мурат и телеграм-канал
Адыгеим щыщ адыгэ спортсменэу Шъхьэумэжъ Амир илъэс 20-м нэс зыныбжь ныбжьыкӏэхэм урым-грек бэнакӏэмкӏэ Европэм изэнэкъокъу джэрз медалыр къыщыдихыгъ. Ащ фэгъэхьыгъэу ичылагъо хъытыухэм къащиӏотагъ Адыгэ Республикэм и лӏышъхьэу Къумпӏыл Мурат.
Темыр Македонием ит къалэу Скопье зэнэкъокъухэр щыкӏуагъэх. Амир УФ-м ихэшыпыкӏыгъэ куп хэтыгъ. Килограмм 67-м нэс къэзыщэчыхэрэм якуп ящэнэрэ чӏыпӏэр къыщыдихыгъ.
- Адыгеим испортсменхэм ягъэхъагъэхэм яугъоин джыри тын инкӏэ къыхэхъуагъ. Ахэр зэкӏэ илъэсыбэрэ пкъы-гъэхъыем, псэемыблэжьныгъэм, гъэсакIомэ яIэзагъэ-гъэсагъэ ӏофшӏэн къакӏэкӏуагъэх. Шъхьэумэжъ Амир ишэн анахь дэгъухэр къыгъэлъэгъуагъэх ыкӏи спортсмен лъэшхэм ягъэхьазырынкӏэ тишъолъыр мэхьанэшхо зэриӏэр къыгъэшъыпкъэжьыгъ, — ытхыгъ Къумпӏыл Мурат.
Джы Амир джыри купым илӏыкӏоу Нэхае Рэмэзан игъусэу илъэс 20-м нэс зыныбжь ныбжьыкӏэхэм урым-грек бэнакӏэмкӏэ дунэе зэнэкъокъум кӏощт. Зэнэкъокъур шышъхьэIум и 17-м къыщегъэжьагъэу и 23-м нэс Словакием щыкӏощт.
Comments
Post a Comment