Адыгэ Республикэм и Красногвардейскэ район ит къуаджэу Джамбэчые унэе фермерэу Хъунаго Гощпакъ Даутэ ыпхъоу ие мэкъумэщ хъызмэтым ичӏыгу пындж шӏыгъэнымкӏэ джырэ уахътэм диштэрэ заводыкӏэ щагъэфедэнэу рагъэжьагъ (2024). Заводыр цикл икъу зиӏэ производственнэ предприятиеу щыт, лэжьыгъэр штэгъэным ыкӏи ухъумэгъэным къащегъэжьагъэу продукцие хьазыр къыдэгъэкӏыгъэным нэсыжьэу.
Адыгэ Республикэм и ЛIышъхьэу КъумпIыл Мурат пынджлэжь хъызмэтшIэпIэм щыIагъ
26.11.2025
Адыгэ Республикэм и ЛIышъхьэу КъумпIыл Мурат Красногвардейскэ районым зэкIом, республикэм ипынджлэжь хъызмэтшIэпIэ пэрытхэм ащыщэу Хъунэго Гощпакъэ пэщэныгъэ зыдызэрихьэрэм щыIагъ. Республикэм ипащэ технологиеу щагъэфедэрэм зыщигъэгъозагъ, ащ къыщыдагъэкIырэр нахьыбэ шIыгъэнымкIэ хэкIыпIэу иIэхэм уасэ къаритыгъ, пынджлэжьыным зегъэушъомбгъугъэнымкIэ амалэу щыIэхэм ягугъу къышIыгъ.
Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, АР-м и Къэралыгъо Совет – Хасэм и Тхьаматэ игуадзэу Iэщэ Мухьамэд, АР-м мэкъу-мэщымкIэ иминистрэу Къуанэ Анзаур, муниципальнэ образованиеу «Красногвардейскэ районым» ипащэу Гъубжьэкъо Темур.
МэкъумэщышIэ-фермер хъызмэтшIапIэр зие Хъунэго Гощпакъэ къызэриIотагъэмкIэ, пынджым икъэгъэкIынкIэ джырэ шапхъэхэм адиштэрэ технологиехэр къызфагъэфедэх. Ащ ишIуагъэкIэ лэжьыгъэу къахьыжьырэм хэхъо зэпыт. Мыгъэ пынджшIапIэхэм гектар 280-рэ ахагъэхъуагъ. МэкъумэщышIэ-фермер хъызмэтшIапIэм пстэумкIи гектар мин 1,5-мэ пынджыр ащишIэгъагъ. Непэрэ мафэм ехъулIэу гектар мин 1,3-мэ е лэжьэкIупIэхэм япроцент 87-мэ пынджыр ащыIуахыжьыгъ. Зы гектарым пындж центнер 65-рэ къырахыжьы, пстэумкIи пындж тонн мини 8,3-рэ къахьыжьыгъах. ГъэрекIорэм егъэпшагъэмэ, зы гектарым центнери 5-кIэ нахьыбэу къырагъэты.
Мы хъызмэтшIапIэм пынджыр зэрэщалэжьырэм имызакъоу, продукцие хьазырхэри къыщыдагъэкIых. АР-м и ЛIышъхьэ мэкъумэщ предприятием ипынджышI заводэу Джамбэчые дэтым зэкIом, Хъунэго Гощпакъэ ащ фэгъэхьыгъэу къыфиIотагъ. Чэщ-зымафэм предприятием пындж тонн мини 150-рэ къыдигъэкIын елъэкIы. Ащ ипащэу Руслан Оганесян къызэриIуагъэмкIэ, лъэпкъищэу зэтеутыгъэу пындж зэтегъэпхъыгъэхэр мыщ къыщашIых.
Хъунэго Гощпакъэ имэкъумэщышIэ-фермер хъызмэтшIапIэ изегъэушъомбгъункIэ анаIэ къызэратетым, къэралыгъо IэпыIэгъу къызэраратырэм афэшI республикэм ипащэхэм зэрафэразэр риIуагъ. КъумпIыл Мурат къулыкъу гъэнэфагъэхэм пшъэрылъ афишIыгъ чIыгулэжь чанхэм сыд фэдэрэ лъэныкъокIи IэпыIэгъу арагъэгъотынэу. Мэкъумэщ-къыдэгъэкIыжьыным IэпыIэгъу фэхъугъэныр лъэныкъо шъхьаIэхэм ащыщэу къызэрэнэжьырэр ащ хигъэунэфыкIыгъ.
«Мэкъу-мэщым зегъэушъомбгъугъэныр Урысыем и Президент къыгъэуцугъэ пшъэрылъ шъхьаIэу щыт. Игъорыгъозэ чIыгулэжьхэм IэпыIэгъу тафэхъу, мэкъумэщ-къыдэгъэкIыжьыным пае федеральнэ гупчэм ыгъэнэфэрэ IэпыIэгъу лъэпкъхэр зэкIэ ятэгъэгъоты, продукциер нахьыбэу къыдэгъэкIыгъэнымкIэ ищыкIэгъэ амалхэр зетэхьэх»,— къыIуагъ КъумпIыл Мурат.
ПынджлэжьынымкIэ амалэу щыIэхэм къатегущыIэзэ, Адыгеим и ЛIышъхьэ IофышIэхэр гъэхьазырыгъэн, научнэ гупчэхэм зэдэлэжьэныгъэу адыряIэм зегъэушъомбгъугъэн, технологиякIэхэр гъэфедэгъэнхэ зэрэфаем анаIэ тыраригъэдзагъ. Пынджым иIухыжьын Адыгеим зыщаухыщтым иIофыгъуи шъхьафэу тегущыIагъэх.
Адыгэ Республикэм мэкъу-мэщымкIэ и Министерствэ къызэритыгъэмкIэ, гурытымкIэ зы гектарым пындж центнер 60,5-рэ къырахыжьы. Илъэсыбэ хъугъэ ащ фэдэу гъэбэжъушхо къызамыхьыжьыгъэр. Ау чъэпыогъум зэлъыпытэу ощххэр къызэрещхыгъэм къыхэкIэу пынджым иIухыжьын чIыгулэжьхэр гужъуагъэу фежьагъэх. Гектар мини 9,8-у яIэм щыщэу непэрэ мафэм ехъулIэу къаIожьыгъэр гектар мини 6,9-рэ е процент 71-рэ. Мыгъэ пынджым шынэгъэкIэшхо зэрэзыдиIыгъыр чIыгулэжьхэм къаIуагъ. Ащ игъэгъушъыжьыни мылъку гъэнэфагъэ пэIохьэ. Республикэм и ЛIышъхьэ АР-м мэкъу-мэщымкIэ и Министерствэрэ пынджыр зыщалэжьырэ районхэм яадминистрациехэмрэ пшъэрылъ афишIыгъ Iоныгъор аухынымкIэ чIыпIэ къин ит хъызмэтшIапIэхэм IэпыIэгъу афэхъунхэм пае кIуачIэу ыкIи амалэу яIэр зэдырахьылIэнэу.
Адыгэ Республикэм и ЛIышъхьэ ипресс-къулыкъу къытырэ къэбархэмкIэ - ЛС
АМ
Comments
Post a Comment