Сурэтыр зытрихыгъэр : Эдуард Лаутеншлегер/Советская Адыгея.
Министрэхэм Я Кабинет 2025-рэ илъэсым ӏоф зэришӏэрэм фэгъэхьыгъэ къэгущыӏэнэу къышӏыгъэм Адыгеим и лӏышъхьэу Къумпӏыл Мурат къыщыхигъэщыгъ зекIо-турист къэкӏуапӏэу республикэм къихьэрэм зыпкъ итэу зэрэхахъорэр.
Блэкӏыгъэ илъэсым Адыгеим туристхэм япчъагъэ нэбгырэ миллионым нэсыгъ, илъэскӏэ узэкӏэӏэбэжьмэ, ар процент I7-кӏэ нахьыб. Анахьэ инэу щытыгъэр щылэ мазэ мэфэкӏхэм ялъэхъан туристхэр къызэрэкӏохэрэр ары: ахэм япчъагъэ нэбгырэ I56 000-м ехъугъ, ар процент 32-кӏэ нахьыбэ хъугъэ.
Туризмэм ихэхъоныгъэ республикэм иэкономикэ шӏуагъэ къригъэкӏыгъ: хьакӏэщхэм яхахъохэр процент I2-кӏэ сомэ миллиарди 3,7-м нэсыгъэх, республикэм ибюджет хьакъулахьэу къихьэрэр фэдитӏукӏэ нахьыбэ хъугъэ: сомэ миллион 227-м .
Туристхэр нахьыбэ къэкIонхэм яӏахьышхо хашӏыхьэ хъугъэ-шӏэгъэ ыкӏи зекIо-щхын фестивалхэм.
Илъэс къэс Адыгэ къуаем ифестиваль туризмэм кӏэщакӏо фэхъугъах. Блэкӏыгъэ илъэсым ӏофтхьабзэм нэбгырэ 70 000 къекӏолӏагъ.
Щхын фестивалыкӏэу «Зэкъошныгъэм Ионджэкъ» зыфиӏорэр жъоныгъуакIэ мазэм ыкӏэм рагъэжьагъ. Ащ мурадэу иӏэр Адыгеимрэ нэмыкӏ шъолъырхэмрэ япщэрыхьапӏэ нэӏуасэ зыфишӏызэ лъэпкъхэм азыфагу илъ ныбджэгъуныгъэр гъэпытэгъэныр ары. Фестивалыр зыщыкӏорэ чӏыпӏэр къалэу Адыгэкъалэ щагъэкӏэжьыгъэ паркыр ары.
Comments
Post a Comment