Мыекъуапэ дэт хьакӀэщэу «Адыгеим» игъэкӀэжьын ин зыкӀэрашӀылӀагъэр ыкӀэм фэкӀо. Адыгэ Республикэм и ЛӀышъхьэу КъумпӀыл Мурат зэтырагъэпсыхьажьыгъэ псэуалъэм еплъынэу кIуагъэ,- джащ фэдэу къетхы гъазетэу «Советскэ Адыгеим».
Проектыр инвесторэу Виктор Михайловскэм егъэцакӀэ. 1970-рэ илъэсхэм агъэпсыгъэ хьакӀэщ унэм ыпэшӀуекӀуагъэу зыфигъэзэгъэжьыныр, ар зыфэлажьэщтыгъэ шӀуагъэр къыгъэнэжьыныр пшъэрылъэу ащ къыфагъэуцугъ.
Проектыр къызыдэтштэм мылъкур зэрэдэгъущтым анахьэу тынаӀэ тедгъэтыгъ: ежь унэри, ащ къегъэкӀухьэрэ чӀыпӀэри дахэу, къэлэ гупчэм иархитектурэ зэдештэу щытынхэ фае. Я 20-рэ лӀэшӀэгъум ыгузэгу щыӀэгъэ унэм идэхагъэу хэлъыгъэр къызэрагъэзэжьыщтым инвесторми тыдэгущыӀагъ, къыӀуагъ КъумпӀыл Мурат.
Предпринимателым къызэриӀуагъэмкӀэ, хьакӀэщ комплексыр чэзыу-чэзыоу агъэфедэ хъущт: мэкъуогъу мазэм хьакӀэхэм фэӀо-фашӀэхэр ащарагъэгъотыщтых, щхапIэу къыщызэӀуахыщтыр къэкӀощт мазэм хьазырыщт, спа-комплексыр илъэсым ыкӀэм къыщызэӀуахынэу рахъухьэ. Зэтырагъэпсыхьэжьыгъэ хьакӀэщым жъуагъуитф къыфагъэшъошэнэу раплъэх.
Comments
Post a Comment