Мэлылъфэгъум и 16-м къыщегъэжьагъэу и 21-м нэс зэрэУрысые зэнэкъокъоу «Петр Великий и Кубок» зыфиӀорэр Санкт-Петербург щыкӀуагъ. Урысые Федерацием ишъолъыр 42-мэ къарыкӀыгъэ спортмен 2900-рэ фэдиз зэӀукӀэгъум щызэӀукӀагъэх, Адыгэ Республикэм All-Style Karate Федерациеу щыӀэм къызэритыгъэмкӀэ, «Советскэ Адыгеим» къетхы.
Адыгеим испортмени 5 хэлэжьагъ. «Full Contact Fights with Protective Equipment» зыфиӀорэ лъэпкъымкӀэ спортменхэр зэнэкъокъугъэх. Ащ зэрэхабзэу щытымкӀэ, уӀэбэкӀэ, лъэбэкӀэ, лъэгонджэкъкӀэ, ӀэшъхьэкӀэ уеон, бдзэн, чӀышъхьашъо зэбэнхэр пшӀэнхэ плъэкӀыщт. НэмыкӀ шъолъырхэм къарыкӀыгъэхэм язэӀукӀэгъухэр пхъашэу кӀуагъэх, Адыгеим испортменхэм зэрагъэсагъэхэр, текӀоныгъэр къахьыным зэрэпылъыгъэхэр къагъэлъэгъуагъ.
Адыгэ Республикэ Гимназием щеджэрэ, бгырыпх шӀуцӀэ зыщыгъэ Пакъэ Астэмыр (тренерэу Владимир Васильченкэр) Ленинград, Москва, Челябинскэ, Саратов хэкухэм, Санкт-Петербург къарыкӀыгъэхэм шъхьамысыжьэу атекӀуагъ. Илъэс 14 — 15 зыныбжьхэм (кг 72-м нэс) апэрэ чӀыпӀэр къащыдихыгъ.
Ышэу Пакъэ Самир (тренерэу Владимир Васильченкэр) республикэ командэм дышъэ медаль къыфихьыгъ. Илъэс 12 — 13 зыныбжьхэм (кг 39-м нэс) ар ащыбэнагъ.
Ислъам Хьамдохъури, Никита Ивахненкэр итренерэу, а ныбжьыкӀэ купым джэрзыр къыщихьыгъ.
Comments
Post a Comment