Атлетикэ онтэгъумкIэ Урысые Федерацием иныжьыкIэ зэнэкъокъу гъэтхапэм и 23-м къыщегъэжьагъэу мэлылъфэгъум и 1-м нэс къалэу Каспийскэ щыкIуагъ. Ащ Адыгэ Республикэм илIыкIохэм гъэхъэгъэшIухэр ашIыгъэх, медаль 12 къахьыгъ.
Зэнэкъокъум къэралыгъом ишъолъыр зэфэшъхьафхэм къарыкIыгъэ нэбгырэ 450-рэ хэлэжьагъ. Илъэс 13 — 15 ыкIи 13 — 17 зыныбжь кIалэхэмрэ пшъашъэхэмрэ заушэтыгъ.
Адыгэ Республикэм испортменхэр къахэщыгъэх ыкIи дышъэ медальхэр къахьыгъэх Красногвардейскэ районым щыщ Цэй Асхьадрэ Мыекъуапэ илIыкIоу Арина Бульбасрэ.
Асхьад килограмм 96-м нэс къэзыщэчыхэрэм якуп хэтыгъ, екIолIэгъуитIум килограмм 255-рэ къыIэтыгъ. Аринэ килограмми 122-рэ къыIэтыгъ. Пэрытныгъэр зыубытыгъэхэр зыгъасэхэрэр атлетикэ онтэгъумкIэ олимпие и\спорт еджапIэу Чыржьын Мухьарбый ыцIэ зыхьырэм итренерхэу Чэмбэхъу Анзоррэ Алексей Красновымрэ.
Джащ фэдэу ящэнэрэ чIыпIэхэр къыдахыгъэх Шэуджэн районым испортменхэу Ламыкъо Амиррэ Бырдж Айдэмыррэ.
Тэхъутэмыкъое районым зыщызыгъэсэрэ Андрей Кармановым джэрз медаль къыфагъэшъошагъ.
Илъэс 13 — 15 зыныбжь кIалэхэр зыхэт командэхэм язэнэкъокъу Адыгеим илIыкIохэм ящэнэрэ чIыпIэр къыщыдахыгъ.
Comments
Post a Comment