Адыгэ Республикэм икинорежиссерэу, фильмхэр зытырахырэ компаниеу «Адыгэ-Фильмым» ипащэу, Адыгэ Республикэм ыкӀи Къэбэртэе-Бэлъкъар Республикэм ягъэшIувгъэ артистэу Нэгъэплъэ Аскэрбый ифильмхэр Красноярскэ шъолъырым икъэлэитӀу къыщагъэлъэгъуагъэх, етхы «Советскэ Адыгеим».
Мэфэ плӀым къыкӀоцӀ Нэгъэплъэ Аскэрбый ифильмхэр Красноярскэ ыкӀи Дивногорскэ чӀыпӀэ заулэмэ ащагъэлъэгъуагъэх. «Адыгэхэр: ШӀуагъэм игъогу», «ГукӀэгъум илӀыхъужъныгъ», «Щагъды: Щабзэм ешъуагъ» зыфиӀохэрэр ары цӀыфхэм алъэгъугъэхэр. Ахэм апэ итыгъ режиссерэм итворческэ къэгъэлъэгъон, адыгэ лъэпкъым итарихъ, ипасэрэ культурэ цӀыфхэр ащыгъэгъозэгъэнхэр. Ащ иблэкIэу Адыгеим къикӀыгъэ хьакӀэм Красноярскэ ыкӀи Дивногорскэ къащырагъэплъыхьагъ, къащырагъэкӀухьагъ. Шъолъыр телевидением ыкӀи радиом занкIэу къыщагъэгущыIагъ.
Адыгеим щыщ псапэшӀэу Щэумэн Хьазрэт Красноярск шъолъырым дэгъоу зэрэщашӀэрэр, шӀу зэрэщалъэгъурэр директорым къыхигъэщыгъ. Красноярск ипсэуалъэ мэхьанэшхо зиӀэу бэ ащ ыӀэ зыхэлъыр, дышъэ къычӀэхыным хилъхьэгъэшхом ишӀуагъэкӀэ непэ къызнэсыгъэми шъолъырым ипромышленность пэрыт.
Красноярск щыӀэгъэ зекӀоми, цӀыфхэм зэӀукӀэгъухэр бэу зэрадытиӀагъэхэми тишъолъыритӀу нахь зэпэблагъэ зэрэхъущтхэм сыщэгугъы, икӀэух къышӀыгъ Нэгъэплъэ Аскэрбый.
Директорым къызэриӀуагъэмкӀэ, зэкӀэ зэӀукӀэгъухэр гуфэбэныгъэ-шӀушӀэныгъэ зэфыщытыкӀэхэм ахэтыгъэх.
Comments
Post a Comment