Адыгеим щыщ Нащ Расул (сэмэгумкӀэ апэрэр)
Урысые Федерацием самбэмкӀэ изэнэкъокъу Санкт-Петербург щэкӀо. Адыгеим испортменхэм медалищ къахьыгъ,- Адыгэ Республикэм самбэмкӀэ иолимп хэхыгъэхэм яспорт еджапӀэ къыщишӀыгъэ къэбарыр «Советскэ Адыгеим» къетхьы.
СпортымкӀэ ыкӀи самбэмкӀэ анахь дэгъухэм ацӀэ къыдахыным фэшӀ хэгъэгум испортмен анахь лъэшхэу нэбгырэ мин фэдиз спорт унэшхом ибэнапӀэм теуцуагъэх.
— Мыр спорт мафэпчъым иӀофтхьабзэ шъхьаӀэхэм ащыщ, джырэ илъэсым дунэе зэнэкъокъухэм ахэлэжьэщт лъэпкъ командэ зэхэуцогъэ зэрэхъущтыр ащ къыгъэнэфэ, — къыщаӀуагъ спорт еджапӀэм.
Адыгеим испортменэу Нащ Расул кг 71-рэ зыщэчырэхэм ахэлажьи, тыжьын медалыр къыдихыгъ. ЦыкӀу Рэмэзан кг 64-рэ зыщэчырэхэм яятӀонэрэ хъугъэ (тыжьын медал). Ахэр джы Урысыем ыцӀэкӀэ Европэм изэнэкъокъу хэлэжьэщтых. Батмэн Амин кг 53-рэ зыщэчырэхэм ящэнэрэ хъугъэ - джэрз медал.
Шъугу къэтэгъэкӀыжьы, Урысые Федерацием ибыракъ ыкӀи илъэпкъ орэд къыщаIонэу Урысыем ихэшыпыкӀыгъэ командэ дунэе зэнэкъокъухэм ахэлэжьэн илъэкӀыщт.
Адыгеим щыщ ЦыкӀу Рэмэзан (сэмэгумкӀэ апэрэу щыт)
Адыгеим щыщ Батмэн Амин (джабгъумкӀэ апэрэу щыт). Сурэтыр нэмыкӀ зэнэкъокъу, ныбжьыкӀэхэм я Дунэе зэнэкъокъу, тхьамафитӀукӀэ узэкӀэӀэбэжьмэ, щытырахыгъ.
Адыгеим испортменхэр
Comments
Post a Comment