Гъэтхапэм и 21-м ичэщэу 22-м Адыгэ илъэсыкӀэр къэсы. Ошъогушхо ушэтынхэр иӀэх ыкӀи гъэтхапэм и 22-м мафэмрэ чэщымрэ зэфэдиз зыхъурэ уахътэм епхыгъ - "Гъэрэ чӀырэ щыызэхэкӀ". Ащ щегъэжьагъэу мафэм хэхъоу регъажьэ, чӀыопсым ичэзыукӀэ - ИлъэсыкӀэр къегъэлъагъо.
Ижъырэ лъэхъаным ИлъэсыкӀэр уашъом ит жъогъо купхэм - «Жъогъо бэ», - «Жъогъо бэ чӀым къыхэчъыгъ» зыфиӀохэрэм къахэщыгъэу, тыгъэр къызыкъокӀырэ чӀыпӀэм лъыплъэхэзэ агъэмэфэкӀыщтыгъэ. Ащ пае мегалит псэолъэ шъхьафхэр ашӀыщтыгъэх. Мы мафэр адыгэ хабзэм тетэу хагъэунэфыкӀы.
ИлъэсипшӀым ехъугъэу мы мафэр адыгэ дунаим, Адыгэ хэкум Адыгэ Республикэм, Къэрэщэе-Щэрджэс Республикэм, Къэбэртэе-Бэлъкъар Республикэм, Хы ШӀуцӀэ Ӏушъом щыӀэ Шапсыгъэ хэкум ащыхагъэунэфыкӀы. Адыгэ хэхэсхэм ащыщэу Тыркуем, Сирием, Иорданием, Израиль, Европэм, Америкэм якъэралхэм, нэмыкӀхэм ащыхагъэунэфыкӀы.
Мы мафэм адыгэхэр, дунаим тет цӀыф лъэпкъхэр мамырныгъэ ахэлъэу псэунхэм фэшӀ адыгэ хабзэм тетэу Тхьэм елъэӀух.
Мы мафэм фэгъэхьыгъэ тхьэлъэӀухэм ащыщ адыгабзэкӀэ мыщ къыкӀэлъыкӀорэр. Джащ фэдэу Адыгэ Республикэм щыпсэурэ адыгэ активистхэм ашӀыгъэ видео.
Адыгэ илъэсыкIэ мафэм фэгъэхьыгъэ тхьалъэIу
Дунэешхор зылэжьыгъэу,
ЩымыIэр къэзыгъэхъоу
Къэхъурэр зэлъэIоу, шIогъабэ зытэу,
Ытырэм кIэмышъугъужьырэ
Ти Тхьэшхо лъапIэ
Илъэсэу къихьэрэм ехъулIэу
Адыгэ лъэпкъым пае телъэIу.
Тыдрэ чIыпIи щыпсэурэ адыгэхэм
Насыпыр къытэбэкIэу, узи бзаджи къытщаухьэу,
Тызэрыс хэгъэгумэ пый къафыкъомыкIэу,
Пый къыкъокIыгъэми тинасып текIоу,
ТыздэщыIэм огъуи гъабли зауи къынэмысэу,
Уаимэхэр IэкIыб тфэхъухэу,
Игъуаджи екIагъи къытхэмыкIэу,
ШIугъэм фэтыузэнкIэу,
Мамыр щыIэкIэ тхъагъо
ИлъэсыкIэм Тхьам зэкIэхэми къытфехь.
Тинасып дахэу, тигугъэхэр лъагэхэу,
Тиакъыл щэрыоу, тигъашIэ кIыхьэу,
ТицIыфышъхьэ бэгъо зэпытэу,
ТызыкIэхъопсырэр тIэмычIэ къихьэу,
ТызэрэIыгъэу, тызэрэлъытэу,
Тинахьыжъхэр дгъашIохэу, дгъэгушхохэу,
Яжьау бэрэ Тхьам тшъхьащегъэт.
Тисабыйхэр IорышIэхэу, пIугъошIу-лэжьыгъошIу,
Тхьам тфешIых.
ТиIэгухэр ренэу хъяр кIуапIэхэу,
ЛIышIу епсыхыпIэхэу,
Тищагумэ псэуалъэр адизэу,
Тиунэхэр ордэунэжъхэу,
УнэпIэ мафэхэу, цужъы укIыпIэхэу,
Къихьэрэмэ къырахьэу, икIырэмэ къыранэу,
ТигушIуагъуи тигъомыли зэпымычхэу,
Тхьам зэкIэ адыгэхэм илъэсыкIэм щыIэкIэшIу къытет.
Тиунагъомэ ацIэкIэ тылъаIомэ,
Хыкъумым фэдэу изыр тигъэщэу,
ПцIэпцIэжъэу зэгочырэр тишъуатэу,
ТиконычIэ изытхъырэр лэжьыгъэшIоу,
Лы пщэрхэр тилыкъумэ апизыбзэу,
Тишъэжъыяцэ Iузыгорэр лыжъэу,
Тибжьэматэмэ шъоур адизэу,
Хъун-шхыным илъэс реным Тхьам тыщемыгъакI.
Орэд къэзыIорэр типшъашъэу,
Имызэу гущыIэрэр тинысэу,
Тисабый мыгъэу, гъэр къытхэмыкIэу,
Нэшхъэигъэр тимакIэу,
Тихъярмэ янахьыбэр нысащэу,
Щыгъын кIэракIэхэр тишъуашэу,
Тиуашъо къаргъоу, тичIылъэ шхъуантIэу,
Тимэщи тиIэщи тфэбагъохэу,
Илъэсым тылэжьыщтыр
Тхьам гухэхъо шхыны тфешI.
Лъэгъун-лъэгъун тиIэу,
Гухэлъ дахэкIэ тышэсымэ, тигъогухэр бзэпсхэу,
Типсыхэр щэнджхэу, чыжьэу тынэсэу,
ТызфэкIуагъэр къыддэхъоу,
Къэдгъэзэжьмэ тIэмычIэхэр ушъагъэхэу,
БылымышIу къэтхьэу, къэтхьыгъэр тфэбагъоу,
Тхьам зэкIэхэми илъэс гупсэф къытет.
Тыбзэ IэшIоу, тихабзэ дахэу,
ТицIыф дгъэлъапIэу, тибзылъфыгъэ ухъумагъэу,
Лъэпкъ гъэшIуагъэу, лъэпкъ лъэпытэу,
Лъэпкъ лъытагъэу, мы дунаим тетхэм
АдыгэхэмкIэ Тхьам ащыщ тешIых.
О, Тхьэм ыгъэпсэуных!
IэкIыбым щыIэ адыгэмэ апае тылъаIомэ,
Тихэкужъ къэкIожьмэ зышIоигъохэу
Фэшъхьафырэ къэралыгъомэ
ЕгъэзыгъэкIэ арысы хъугъэмэ,
ЩыIэкIэ амал къяптэу,
Ятэжъ янэжъхэр зыщапIугъэхэм
Псауныгъэ яIэу, насыпышIохэу,
КъепщэлIэжьынхэу тыкъыолъэIу.
Адыгэм, адыгэу тыдэкIи щыIэм
Насыпыр къытэбэкIэу,
Тинамыс дахэу, тигугъэхэр лъагэхэу,
Тиакъыл щэрыоу, тигъашIэ кIыхьэу,
ГумэкIи гукIаи тимыIэу, узи бзаджи къытщаухьэу,
ЕмыкIу къытэмыхъулIэу,
Зычы-зыпчэгъоу зэдедгъаштэу,
Тызэрыс хэгъэгумэ тагурыIоу,
Тиунагъохэр зэдэIужьхэу,
ИлъэсыкIэу тызыхахьэрэр
Илъэс гухахъо Тхьэм зэкIэхэми тфешI!
Тэу зэшъхьэгъусэхэу Аслъанрэ Нуриеттрэ атхыгъэ тхьалъэIу.
Comments
Post a Comment