Къэралыгъо 11-мэ къарыкӀыгъэ лъэӀу тхылъ 200-м ехъу «Саусрыкъо Дышъэ» кинофестивалым къыӀэкӀагъэхьагъ

 

Я 6-рэ Дунэе кинофестивалэу «Саусрыкъо Дышъэ» Адыгэ Республикэм щыкӀощтым хэлэжьэнхэу къэралыгъо 11-мэ къарыкӀыгъэ лъэӀу тхылъ 200-м ехъу къахьыгъах. Ахэр аштэнхэу мэзаем и 15-м рагъэжьагъ,- Урысые Федерацием икинематографистхэм я Союз ишъолъыр къутамэ къытыригъэзэу «Советскэ Адыгеим» къетхы.

«Саусрыкъо Дышъэ» (ипэм «Адыгея, ШIу Сэлъэгъу!» ицӀагъэр) кинофестивалым лъэӀу тхылъэу къафахьыгъэр бэ дэдэ хъугъэ. Белоруссием, Кыргызстаным, Узбекистаным, Испанием, Италием, Сингапурым, Бразилием, Иран, Боливием къарыкӀыгъэ фильмхэр къыхахыгъэх.

Мыгъэ кинофестивалым дунэе статус къыфагъэшъошагъ, ащ къыхэкӀэу ыцӀэ кӀэу зэблахъугъ — Адыгэ (Черкес) лъэпкъым икультурнэ кӀэн зэрэпхыгъэр къэзыгъэлъагъорэ «Дышъэ Саусрыкъо» зыфиӀорэр. Проектым ихэхъоныгъэкӀэ ар лъэбэкъукӀэу щыт, кино дунаим цӀэ кӀэхэр къыщыхэгъэщыгъэнхэм, дунэе культурнэ зэпхыныгъэхэр гъэпытэгъэнхэм афэгъэхьыгъэ пшъэрылъыр лъегъэкӀуатэ, къыхигъэщыгъ Урысые Федерацием икинематографистхэм я Союз ишъолъыр къутамэ.

Мыщ фэдэ лъэныкъохэм афэгъэхьыгъэ Ӏофтхьабзэхэм ахэлэжьэнхэу къагъэхьырэ лъэӀу тхылъхэр шышъхьэӀум и 15-м нэс мыщ къыщырагъаштэх: https://forms.yandex.ru/cloud/693c6ab695add5453bf59e3a, е электроннэ почтэмкӀэ kinoadigeya@mail.ru. 2024-рэ илъэсым щылэ мазэм нахь пасэ мыхъугъэу ашӀыгъэ ӀофшӀагъэхэр ары ащ хэлэжьэнхэ алъэкӀыщтхэр.

Хэдзын комиссиер Ӏоныгъом и 5-м нэс Ӏоф ышӀэщт. Ӏоныгъом и 6-м къыщегъэжьагъэу и 30-м нэс жюрим фильмхэр ыплъыщтых, текӀоныгъэр къыдэзыхыгъэхэмрэ ятӀонэрэ чӀыпӀэр къыдэзыхыгъэхэмрэ къыхигъэщыщтых. ЦӀыфхэм апае программэр чъэпыогъум и 14-м къызэӀухыныгъэмкӀэ рагъэжьэщт. Егъэджэн программэр, мастер-классхэр, Ӏэнэ хъураер зыхэхьэхэрэр чъэпыогъум и 15 — 16-м зэхащэщтых. Зэфэхьысыжьхэр зыщашӀыщт, текӀоныгъэр къыдэзыхыгъэхэмрэ ятӀонэрэ чӀыпӀэр къыдэзыхыгъэхэмрэ шӀухьафтынхэр зыщаратыжьыщт зэхахьэр чъэпыогъум и 17-м щыӀэщт.