Адыгеимрэ Араб Зэкъотыгъэ Штатхэмрэ (ОАЭ) япредпринимательхэр зэзэгъыныгъэхэм атегущыӀагъэх. Адыгэ Республикэм экономикэ хэхъоныгъэмрэ сатыумрэкӀэ и Министерствэ къызэритыгъэмкӀэ, Араб Зэкъотыгъэ Штатхэм икомпание тфымэ ялӀыкӀохэр зыхэлэжьэрэ зэкӀэкӀожь бизнес миссие Адыгеим щэкӀо.
Мыекъуапэ щыӀэ гупчэу «Сибизнес» зыфиӀорэм Ӏофтхьабзэр щэкӀо. Гъомылапхъэхэр, мэкъумэщ продукциер, унэгъо химиер, косметикэр зыщэрэ компаниехэр рагъэблэгъагъэх. ЧӀыпӀэ производительхэм яэкспорт амалхэр зэрагъэшӀэнхэу ахэр къэкӀуагъэх.
Бизнес миссием иапэрэ мафэ ОАЭ-мрэ Адыгеимрэ якомпаниехэм зэдэгущыӀэгъу 40 фэдиз зэдыряӀагъ. Министерствэм къызэритыгъэмкӀэ, ахэм ащыщхэм экспорт зэзэгъыныгъэхэмкӀэ яперспективахэр пэшӀорыгъэшъэу къащыхагъэщыгъэх.
Бизнес программэм къыхэщыгъэхэм ащыщ B2B шӀыкӀэм тетэу зэхащэгъэ зэӀукӀэгъур. ӀэкӀыб хэгъэгухэм ябизнесрэ чӀыпӀэ къыщыдэзыгъэкӀыхэрэмрэ зэдэгущыӀагъэх къызэращэфыщтхэм, ӀэкӀыб сатыу зэпхыныгъэхэм хэхъоныгъэ ашӀынымкӀэ амалэу щыӀэхэм, хьакӀэхэм ярынкӀэ шапхъэхэм.
Непэ Ӏофтхьабзэм хэлажьэхэрэр шъолъыр унэгъо химие, косметикэ, псауныгъэмкӀэ шхынхэр къыдэзыгъэкӀырэ компаниехэм япроизводственнэ чӀыпӀэхэм ащэкӀох.
«Мы чӀыпӀэ зэӀукӀэгъухэм къагъэлъэгъорэ технологие процессхэр зэдэлэжьэнхэ зышӀоигъохэм ежь-ежьырэу зэхашӀэнхэ, продукцием идэгъугъэ зэрашӀошъ хъущтыр ауплъэкӀун алъэкӀыщт», — къыхигъэхъуагъ ведомствэм.
Шъугу къэтэгъэкӀыжьы, «Экономикэ шъхьащыкӀыгъэу ыкӀи зэнэкъокъушӀу» зыфиӀорэ лъэпкъ проектым къыдыхэлъытагъэу «Сибизнес» зыфиӀорэ гупчэр Ӏоф ешӀэ.
Comments
Post a Comment