Лъэпкъ проектэу «Дунейпсо зэдэлэжьэныгъэмрэ экспортымрэ» зыфиӀорэм къыдыхэлъытагъэу Адыгэ Республикэм и Экспорт ӀэпыӀэгъу гупчэ Азербайджан Республикэм къикӀыгъэ бизнес миссие зэхещэ.
Гъэтхапэм и 10-м къыщегъэжьагъэу и 13-м нэс Ӏофтхьабзэр Мыекъуапэ щыкӀощт. Адыгеим икъыдэгъэкӀакӀохэм япродукцие къащэфыным, пӀэлъэ кӀыхьэкӀэ зэдэлэжьэнхэм афэщагъэхэ бизнес лӀыкӀохэр ӀэкӀыб къэралыгъохэм къарыкӀыгъэ купым хэтых.
Азербайджан гъусэхэм анахьэу ашӀогъэшӀэгъоныр пхъэм хэшӀыкӀыгъэ продукциер, гъомылапхъэхэр ыкӀи шъонхэр, мэкъумэщ продукциер ары.
Программэм хэхьэх лъэныкъуитӀу зэдэзэгъыныгъэхэу B2B зэдэгущыӀэгъухэр. Ахэр Мыекъуапэ дэт Экспортым ӀэпыӀэгъу щызыгъэгъотырэ Гупчэм щыкӀощтых. Мыщ Адыгеим ипроизводительхэм япродукцие ежь-ежьырэу къагъэлъэгъон, ар къащэфын алъэкӀыщтхэм зэраратыщт шӀыкӀэм тегущыӀэн амал щаратыщт. Ащ нэмыкӀэу республикэм ипроизводственнэ чӀыпӀэхэм ащыкӀощт уцупӀэхэр къыдыхэлъытагъэх. ӀэкӀыб къэралхэм къарыкӀыщт хьакӀэхэм предприятиехэм ячӀыпӀэ зыщагъэгъозэн, ахэм яамалхэр, япродукцие идэгъугъэ щыӀэныгъэм щыплъэгъунхэ алъэкӀыщт.
Адыгеим игупчэ Азербайджаным ибэдзэр зыхэхьанэу зишӀоигъо бизнес цӀыкӀу ыкӀи гурытхэу экспортым пылъхэр регъэблагъэх. ЗэдэгущыӀэгъухэр зэхащэгъэнхэмкӀэ, нэмыкӀ къэбарыр зэшӀуегъэкӀыгъэнымкӀэ Адыгэ Республикэм и Экспорт ӀэпыӀэгъу гупчэ зыфэжъугъаз. https://export01.ru
Comments
Post a Comment