Сурэтыр: Адыгеим инароднэ артистэу, хореографэу Нэныжъ Айдэмыр
Адыгэ шэн-хабзэхэм афэгъэхьыгъэ документальнэ фильмым иятӀонэрэ пычыгъоу Адыгэ Республикэм и Къэралыгъо телерадиокомпаниеу «Адыгея ТВ» зыфиӀорэм къыдигъэкӀыгъэу «Культурэм иухъумакӀохэр» зыфиӀорэр VK Video-м къытехьагъ, «Советскэ Адыгеим» къетхы.
Адыгэ ТВ-м ипащэу, проектым икӀэщакӀоу Ацумыжъ Адамэ къызэриӀуагъэмкӀэ, Урысые Федерацием илъэпкъхэм я ЗыкӀыныгъэ илъэс документальнэ проектым игъэцэкӀэн нэмыкӀ мэхьанэ хэхыгъэ щызыубытырэр зыщыщым фэсакъыжьыныр граждан зэхэшӀыкӀым зэрэпытэшъурэр, культурэ зэфэшъхьафхэм ащыщхэм зэгурыӀоныгъэ азыфагу зэрэдишӀэрэр фильмым нафэу къызэригъэлъагъорэр ары.
ЯтӀонэрэ къэгъэлъэгъоным хэлажьэх реставратор ӀэпэӀасэу Нэгъуцу Аслъан, Адыгеим илъэпкъ артистэу, хореографэу Нэныжъ Айдэмыр, дизайнерэу, дышъэегъэшӀ ӀэпэӀасэу Мыгу Рузанэ. Непэрэ дунаим культурэм ишыпкъагъэ зэрэщыухъумэгъэщтым, творческэ хэхъоныгъэхэм шэн-хабзэхэр зыщамыгъэкӀодыхэу, ау къахэзыгъахъохэрэ гъунэр зыдэщыӀэм проектыр атегущыӀэ.
Интернетым хэхъоныгъэ егъэшӀыгъэнымкӀэ институтыр ӀэпыӀэгъу къафэхъуи, фильмэр агъэпсыгъ. ЯтӀонэрэ къыдэкӀыгъом ителевизие къэгъэлъэгъон мэзаем и 20-м сыхьатыр 17:00-м Урысые телевидением иканалэу «Россия 1» зыфиӀорэм Адыгэ къэралыгъо телерадиокомпанием (ГТРК-м) къыщыкӀощт.
Comments
Post a Comment