Адыгэ республикэм щыIэ къутамэу Урысые Федерацием икинематографистхэм я Союз и я 6-рэ Дунэе кинофестивалэу «Дышъэ Саусэрыкъор» зыфиӀорэм иӀофшӀэн зэриублагъэр къаӀуагъ, ар илъэсхэу икӀыгъэхэм «Адыгея СикIас!» зыфиӀорэ цӀэм ыӀэгъагъ,- джащ фээу «Советскэ Адыгеим» къетхы.
Мыгъэ кинофестивалым дунэе чIыпIэ (статус) къыратыгъ ыкӀи ащ къыхэкӀэу цӀэу фаусыгъэр — Дышъэ Саусэрыкъо — адыгэ лъэпкъым икультурэ кӀэн зэрэпхыгъэр къегъэлъагъо. Проектым ихэхъоныгъэкӀэ ар лъэхъан кӀэу щыт, кино дунаим цӀэ кӀэхэр къыщыхэгъэщыгъэнхэм, дунэе культурэ зэпхыныгъэхэр гъэпытэгъэнхэм афэгъэхьыгъэ пшъэрылъыр ащ лъегъэкӀуатэ, къыщеӀо тхыгъэм.
Кинофестивалым хэлэжьэнхэу фаехэм лъэӀу тхылъхэр шышъхьэӀум и 15-м нэс мыщ щаштэх: https://forms.yandex.ru/cloud/693c6ab695add5453bf59e3a е киноадыгея@mail.ru зыфиӀорэ электрон почтэмкӀэ. ӀофшӀагъэхэр 2024-рэ илъэсым щылэ мазэ нахь пасэу ашӀыгъэнхэ фае.
Хэдзын комиссиер Ӏоныгъом и 5-м нэс Ӏоф ышӀэщт. Ӏоныгъом и 6-м къыщегъэжьагъэу и 30-м нэс жюрим фильмхэр ыплъыщтых, текӀоныгъэр къыдэзыхыгъэхэмрэ ятӀонэрэ чӀыпӀэхэр къыдэзыхыгъэхэмрэ къыхигъэщыщтых.
Зэхахьэм къекӀолӀагъэхэм апае программэр чъэпыогъум и 14-м къызэӀухыныгъэмкӀэ рагъэжьэщт. Егъэджэн программэу мастер-классхэр, Ӏэнэ хъурае зэхэгущыӀэгъухэр зыхэхьащтхэр чъэпыогъум и 15-м ыкӀи и 16-м щыкӀощтых.
Зэфэхьысыжьхэр зыщашӀыщт, текӀоныгъэр къыдэзыхыгъэхэмрэ ятӀонэрэ чӀыпӀэхэр къыдэзыхыгъэхэмрэ шӀухьафтынхэр зыщаратыжьыщт зэхахьэр 2026-рэ илъэсым чъэпыогъум и 17-м рагъэкӀокӀыщт.
Comments
Post a Comment