Быжъо Тимур - Закъуэ Анзор - Шырыу Иналбек
Урысыем икъалэу Красноярскэ щыкӀогъэ Дунэе зэнэкъокъоу Иван Ярыгиным ыцӀэкӀэ щызэхащагъэм шъхьафит бэнэнымкӀэ адыгэ бэнакӀуищымэ кг 74-м къыщегъэжьагъэу апэрэ чӀыпӀищыр къыщыдахыгъ.
Аужырэ зэӀукӀэгъум Быжъо Тимур апэрэ чӀыпӀэр къыщыдихыгъ, Закъуэ Анзор ыгъэпщагъ. Ящэнэрэ чӀыпӀэр бэнакӀутӀумэ афагъэшъошагъ: Шырыу Иналбек (адыгэ) ыкӀи Сидак Зэурбек (осетин).
Зэнэкъокъум ыгъэшӀэгъоныгъэр полуфиналым къыщыхъугъ, Закъуэ Анзор Олимпиадэ джэгунхэм ячемпионэу Сидак Зэурбек текӀуагъ.
Адыгэ бэмэ а текӀоныгъэхэр гушӀуагъоу чылагъо хъытыухэм къащагъэлъэгъуагъэх, ау адыгэ бэнэкӀо лъэшхэу нэбгырищ зы онтэгъугъэу кг 74-м зэрэщызэбэныгъэхэм зыхэушъхьафыкӀыгъэхэри ахэтых. Ахэм зэтемыфэрэ онтэгъугъэхэм ащызэбэнэхэмэ нахьышӀу алъэгъу.
Дунаим щыцӀэрыӀоу, Олимпиадэ джэгунхэм, дунэе зэнэкъокъухэм медальхэр къащыдэзыхыгъэ бэнакӀохэр зыхэлажьэхэрэ Иван Ярыгиным и Кубок зэраубытырэ зэнэкъокъур дунаим щыкӀогъэ анахь мэхьанэшхо зиӀэ бэнэныгъэ зэнэкъокъухэм ахалъытэ. Зэнэкъокъум мэфэкӀ шъуашэ иӀ, нэбгырэ мин пчъагъэ еплъынэу къэкӀо.
Comments
Post a Comment