2026-рэ илъэсым мэзаем и 16-м къыщегъэжьагъэу и 24-м нэс Урысые Федерацием онтэгъу къэӀэтынымкӀэ изэнэкъокъу ныбжьыкӀэ кӀалэхэмрэ пшъашъэхэмрэ азыфагу щыкӀуагъ. Илъэс 15 — 18-рэ ыкӀи 19 — 20-рэ зыныбжьхэр ащ хэлэжьагъэх. Хэгъэгум ишъолъыр 30-мэ къарыкӀыгъэ спортсмен 250-рэ зэнэкъокъум хэлэжьагъ, «Советскэ Адыгеим» къетхы Адыгэ Республикэм физкультурэмрэ спортымрэкӀэ и Комитет къэбарэу къитгъэмкIэ.
Зэнэкъокъу пхъашэм республикэм испортсменхэм медаль зэфэшъхьафхэр 15 къыщыдахыгъэх. Командэ зэнэкъокъум Адыгеим ихэшыпыкӀыгъэ командэ апэрэ чӀыпӀэр къыщыдихыгъ.
Илъэс 15 — 18 зыныбжь кӀалэхэм якуп кг 61-рэ къэзыӀэтыгъэхэм Ацумыжъ Самир (тренерхэр А. Горловыр, Р. Казаковыр) дышъэ медальищ къащыдихыгъ КъэпхъотэгъэнымкIэ, чIэIэтыгъэнымкIэ, зэдызэхэубытагъэмкӀэ кг 105/12Ӏ/226-рэ къыгъэлъэгъуагъ.
Илъэс 15 — 18 зыныбжь ныбжьыкӀэхэм якуп кг 89-рэ къэзыӀэтыгъэхэм ащыщэу Никита Карповым (тренерхэр А. Горловыр, Р. Казаковыр) дышъэ медалитӀу къыхьыгъ — чIэIэтыгъэнымкIэ, зэдызэхэубытагъэмкӀэ, кг 128/174/302-рэ къыхьыгъ.
Илъэс 19 — 20 зыныбжь ныбжьыкӀэхэм якуп кг 61-рэ къэзыӀэтыгъэхэм ащыщэу Бгъуашъэ Асхьад (тренерэу А. Сыхъум) тыжьын медальищ къыхьыгъ — КъэпхъотэгъэнымкIэ, чIэIэтыгъэнымкIэ, зэдызэхэубытагъэмкӀэ кг 96/123/219-рэ хъугъэх.
Илъэс 15 — 18 зыныбжь кӀалэхэм якуп кг 73-рэ къэзыӀэтыгъэхэм ащыщэу Иван Токарчук (тренерхэр В. Хьапэпхъурэ Р. Казаковымрэ) тыжьын медалитӀу къыхьыгъ - чIэIэтыгъэнымкIэ, зэдызэхэубытагъэмкӀэ кг 120/145/265-рэ къыгъэлъэгъуагъ.
Илъэс 15 — 18 зыныбжь кӀалэхэм якуп кг 55-рэ къэзыӀэтыгъэхэм ащыщэу Роман Оглы (тренерэу А. Сыхъум) тыжьын медалитӀу къыдихыгъ — чIэIэтыгъэнымкIэ, зэдызэхэубытагъэмкӀэ кг 87/114/201-рэ къыӀэтыгъ.
Ащ фэдэ онтэгъугъэмкӀэ илъэс 15 — 18 зыныбжь кӀалэхэм ащыщэу Андрей Кармановым (тренерхэр В. Хьапэпхъурэ В. Васюхинымрэ) джэрз медальищ къыхьыгъ, — КъэпхъотэгъэнымкIэ, чIэIэтыгъэнымкIэ, зэдызэхэубытагъэмкӀэ кг 89/11Ӏ/200-рэ къыӀэтыгъ.
Comments
Post a Comment