Сурэтыр: Тюмень шъолъырым и Къэралыгъо автоном учреждениеу «Тюмень-Дзюдо» зыфиӀорэ спорт ыкӀи гъэхъужьыныгъэ Гупчэм. ЛӀыбзэ Ислъам джабгъумкӀэ апэрэу щыт.
Олимпиадэ чӀыпӀэхэр къыдэзыхыгъэхэм я Адыгэ республикэ спорт еджапӀэу дзюдомкӀэ Я. К. Коблэм ыцӀэ зыхьырэм щеджэрэ ЛӀыбзэ Ислъам Урысые зэнэкъокъоу «ЛэжьэкӀо къарухэм» яшӀухьафтын фэгъэхьыгъэу дзюдомкӀэ кӀэлэ ыкӀи пшъэшъэ ныбжьыкӀэхэу U15-м хэлажьэхэрэм язэнэкъокъу джэрз къыщихьыгъ, ащ игъэсакIоу Бастэ Сэлымэ «Советскэ Адыгеим» къыриӀуагъ.
2011 — 2012-рэ илъэсхэм къэхъугъэ спортсмен 200-м ехъу Урысыем ишъолъыр 19-мэ къарыкӀыгъэу зыщызэбэныгъэхэр Тыумень щыкӀуагъэх. ЛӀыбзэ Ислъам кг 55-м щыбэнагъ, зэӀукӀэгъуи 5 иӀагъ, ахэм ащыщэу плӀыр пэшӀорыгъэшъэу ыхьыгъ, зыр зэнэкъокъум текӀоныгъэр къыщыдэзыхыгъэм ригъэхьагъ, ящэнэрэ хъугъэ.
Ислъам къэлэ, хэгъэгу, шъолъыр зэнэкъокъухэу дзюдомкӀэ ыкӀи самбэмкӀэ зэхащэхэрэм текӀоныгъэр ыкӀи ятӀонэрэ чӀыпӀэр ащ бэрэ къащыдихыгъ. 2026-рэ илъэсым Къыблэ федеральнэ шъолъырым изэнэкъокъу къызэрэкӀощтым джырэ уахътэ зыфегъасэ, къыӀуагъ тренерым.
Comments
Post a Comment