Адыгэ Республикэм испортсменхэу Дэтхъужъ Алыйрэ Мэрэм Дамиррэ джырэблагъэ Урысые Федерацием дзюдомкӀэ и зэнэкъокъоу (кубок) кIуагъэм дышъэ ыкӀи тыжьын медальхэр къахьыгъэх. Ар къыӀуагъ республикэм ипащэу КъумпӀыл Мурат.
Урысые Федерацием ишъолъыр 50-мэ къарыкӀыгъэ дзюдоист нэбгырэ 300-м ехъу, Адыгеим щыщ нэбгырэ 11-рэ ахэтыхэу, Вологдскэ хэкум икъалэу Череповец щызэӀукӀагъэх.
Датхъужъ Алый кг 90-м щыбэнагъ, апэрэ чӀыпӀэр къыдихыгъ. Мэрэм Дамир кг 60-м щыбэнагъ, тыжьын медаль къыдихыгъ.
"Темырланэ Бэслъэнэ (кг 66-рэ) текӀоныгъэ ышӀыным фэшӀ шӀоигъоныгъэ пытэ зэриӀэр къыгъэлъэгъуагъэми, джэрзыр къыӀэкӀэхьаным зы лъэбэкъукӀэ нахь пэчыжьэу къызэрэщынагъэр къыхэзгъэщын сшӀоигъу", — ытхыгъ Адыгеим и ЛӀышъхьэ.
КъумпӀыл Мурат республикэм ихэшыпыкӀыгъэ куп игъэсакIохэм зэрафэразэр къыӀуагъ, гъэсакIохэми, ахэм ягъасэхэми тапэкӀи гъэхъагъэхэр ашӀынхэу афэлъэӀуагъ.
Comments
Post a Comment