2026-рэ илъэсым Ӏоныгъом и 1-м къыщегъэжьагъэу хьакӀэщхэм яӀофшӀэн зэтегъэпсыхьэгъэным фэгъэхьыгъэ урысые экспериментым Адыгеир хэхьащт, ар хэбзэгъэуцугъэмкӀэ аштагъ. Республикэм ит хьакӀэщ пстэуми, ахэр 300-м ехъу мэхъух, афэгъэхьыгъэ къэбархэр Росаккредитацием иреестрэ хэгъэхьэгъэнхэ фае, къыщиӀуагъ республикэм ипащэу КъумпӀыл Мурат и MAX мэссенджер канал.
ХьакӀэщхэр зыӀыгъхэм джы амал яӀэ мэхъу шӀокӀ-гъэпсыкӀэ ӀупкӀэхэм атетэу, тхылъыпӀэ пчъагъэ мыхъоу яӀофшӀэн хабзэм диштэу зэхащэнэу, къытхыгъ ащ.
Адыгеир ушэтынхэм зэрахэлажьэрэм шъолъырым изекӀоным хэхъоныгъэ ышӀынэу ыгъэпсыгъ. Республикэм ипащэ къыхигъэщыгъ шъолъырым къекӀолӀэхэрэм Адыгеир шӀукӀэ агу къинэжьыным, къэкӀожьынхэу ашӀоигъоу зэрэщытхэм хабзэм икъулыкъушӀэхэр зэряпылъхэр.
Урысые Федерацием ишъолъыр пшӀыкӀутф мы ушэтыным зэрэхэлажьэрэм шӀуагъэу къыхьырэм къытегущыӀагъ. Хэгъэгу кӀоцӀ зекӀоным тапэкӀи хэхъоныгъэхэр ышӀынхэм фэшӀ ащ нахь зыушъомбгъугъэн зэрэфаер ащ къегъэлъагъо.
Ащ нэмыкӀэу, унэе псэупӀэхэм зекӀощӀэхэр щыгъэпсэфыгъэнхэр экспериментым къыдыхэлъытагъэу апэрэу къащадэхы, хьакӀэщхэр ежьхэм яшӀоигъоныгъэкӀэ зэрагъэпсыщтхэм елъытыгъэу.
Урысые экономикэ хэхъоныгъэмкӀэ Министерствэм ипащэу Максим Решетниковым къызэриӀуагъэмкӀэ, экспериментым зэхащэгъэщт ӀофшӀэкӀэ щытыкӀэхэм зекӀоным пылъхэм ящыкӀэгъэ шапхъэхэр, щынэгъончъагъэр къащыдэлъытагъэу, къагъэшъыпкъэжьыщтых, шъолъыр бюджетхэм хэхъоныгъэ ашӀынэу, хьакӀэщ инфраструктурэм ихэхъоныгъэ егъэгушхощт.
Лъэпкъ проектэу «ЗекӀонымрэ хьакӀэщ ӀофшӀэнымрэ» зыфиӀорэри шъолъырым изекӀо ӀофшӀэн хэхъоныгъэхэр ышӀынхэмкӀэ ишӀуагъэ къэкӀо. Модульнэ мыуцупхъэ хьакӀэщыкӀэхэр къэралыгъо грантхэмкӀэ ашӀынхэм республикэм хэхъоныгъэ щашӀыгъ. Ахэм ащыщэу 2023 — 2024-рэ илъэсхэм 8 агъэцэкӀагъ, псэупӀэ 119-рэ ахэм ащызэхащагъ. Модульнэ хьакӀэщ проектхэу 3 2025-рэ илъэсым агъэцэкӀэщтых.
Къызытедгъэхьагъэр: «Советская Адыгея»
Comments
Post a Comment