Къэрэщэе-Щэрджэс Республикэм щыщ адыгэ бэнакӀоу Тамбый Адемыркъан самбэмкӀэ Дунэе зэнэкъокъоу ныбжьыкӀэхэм (илъэс 18 — 20) азыфагу щыкӀоу джырэ уахътэм Индонезием щыкӀорэм дышъэ медалыр къыщихьыгъ.
«Адемыркъан кг 88-м къещэчэу зэнэкъокъум хэлэжьагъ ыкӀи зэӀукӀэгъуищ иӀагъ, Таджикистаным, Узбекистаным, Армением къарыкӀыгъэхэм цыхьэшхо зыфишӀэжьэу атекӀуагъ», — къегъаӀо Къэрэщэе-Щэрджэсым физкультурэмрэ спортымрэкӀэ и Министерствэ.
Урысые Федерацием самбэмкӀэ ибэнакӀохэу гъэхъагъэшхо зышӀын алъэкӀыщтхэм ащыщэу зэрэщытыр ащ къыушыхьатыгъ, техникэ ыкӀи тактикэ ухьазырыныгъэ дэгъу зэриӀэр къыхагъэщыгъ.
Ипэм, Тамбый Адемыркъан СамбэмкӀэ Дунэе зэнэкъокъухэм текIоныгъэ къыдихыгъагъ. Джырэ зэнэкъокъум Москва ыцӀэкӀэ хэлажьэ. Ащ игъэсакIохэр Дмитрий Кабановыр, Брат Къэплъан, Оз Магомед.
Шъугу къэтэгъэкӀыжьы, дунаим самбэ зэнэкъокъум ныбжьыкIэ бэнакIо анахь лъэшэу къэралыгъо 33-мэ къарыкӀыгъэхэр хэлэжьагъэх.
Comments
Post a Comment