Атлетикэ онтэгъумкIэ Урысые Федерацием иныбжьыкlэ зэнэкъокъу къалэу Иркутскэ щыкIуагъ. Илъэс 15 — 18 ыкIи 19 — 20 зыныбжь спортсменхэм заушэтыгъ. Къэралыгъом ишъолъыр 54-мэ яатлет анахь лъэшхэр мыщ щызэIукIагъэх.
Адыгэ Республикэр нэбгыри 8-мэ къагъэлъэгъуагъ.
Килограмм 55-м нэс къэзыщэчыхэрэм якуп хэтыгъэ Тэхъутэмыкъое районым щыщ Ацумыжъ Самир тыжьын медаль къыхьыгъ - къэпхъотынымкlэ, къэlэтынымкlэ ыкlи тlури зэхэтэу. Роман Казаковымрэ Артем Горловымрэ ар агъасэ.
«Къэпхъотэным (Рывок)» зыфиIорэ лъэныкъомкIэ зэнэкъокъум текIоныгъэр къыщыдихыгъ Шэуджэн районым илIыкIоу Ордэкъо Астемир. Ащ килограмм 61-м нэс къэзыщэчыхэрэм якуп зыщиушэтыгъ ыкIи килограмми 106-рэ къыIэтыгъ. КIалэм итренерых Хьагъурхэу Хьалимрэ Рэджэбрэ.
Джащ фэдэу Красногвардейскэ районыр къэзыгъэлъэгъогъэхэ Бгъошэ Асхьадрэ Шашэ Рустамрэ ящэнэрэ чIыпIэр къыдахыгъ. Спортсменхэр Сихъу Аслъан егъасэх.
Comments
Post a Comment