Адыгэ хэкум и Хы ШӀуцӀэ Ӏушъо къалэу Анапэ Урысыем и Хы lушъо Самбо и Кубок щыкӀуагъ. Адыгеир нэбгыритфэу ащ хэлэжьагъ, ахэм ащыщэу Тэгъуз Тимур кг 58-рэ къэзыщэчырэмэ апэ иуцуагъ. Адыгэ Республикэм физкультурэмрэ спортымрэкӀэ и Комитет мыщ фэгъэхьыгъэ къэбарыр къытыгъ.
Нэбгырэ 150-м ехъу зэнэкъокъум хэлэжьагъ. Хы lушъо спортымкӀэ Гупчэм зэӀукӀэгъухэр щыкӀуагъэх. КъызэӀухыным хэлэжьагъэх Краснодар краим и Тхьэматэу Вениамин Кондратьевыр, Урысые самбо Федерацием и Президентэу Сергей Елисеевыр.
Илъэс пчъагъэ хъугъэу зэхахьэр зэхатщэ, сыдигъуи анахь спортсмен дэгъухэр къыхэтэхых. Дунэе ыкӀи Европэ зэнэкъокъухэм ахэлэжьэщт хэшыпыкӀыгъэ командэр къыщыхахыщт Урысые зэнэкъокъур къихьащт илъэсми Анапэ щызэхэтщэщт, - къыхигъэщыгъ Сергей Елисеевым.
Тыгъужъ Тимур текӀоныгъэ къызэрэдихыгъэм дакӀоу Адыгеим ихэшыпыкӀыгъэ командэ нэмыкӀ медальхэри къыдихыгъэх, тыжьын медаль къыхьыгъ Коблэ Рамазан (кг 58-рэ), джэрз медальхэр къахьыгъэх Мэлгъощ Адамэ (кг 58-рэ), Анчыкъо Амыр (кг 71-рэ) ыкӀи Бэгъ Сэлымэ (кг 88-м къехъу).
Республикэм испортсменхэр тренерхэу Дылъукъо Адамэ, Гъумэщхъо Анзор, Джэрымыкъо Рустам, Джэрымыкъо Азмэт, Хьабакхъо Адамэ, Шъуманэ Байзор агъэсагъэх.
Comments
Post a Comment