Адыгэ къуаем ия XIV-рэ фестиваль зэрэзэхащэщтым зыфагъэхьазырыгъэным изэхэфын игъэкӀотыгъэу ашӀынэу Адыгэ Республикэм и ЛӀышъхьэу КъумпӀыл Мурат пшъэрылъ афишӀыгъ Адыгеим и Правительствэ и Тхьаматэ игуадзэу ЛӀыхэсэ Махьмуд зипэщэ промышленностым иӀофышӀэхэм. Адыгеим и ЛӀышъхьэ ар социальнэ хъытыухэм къащитхыгъ.
КъумпӀыл Мурат къызэрэхигъэщыгъэмкӀэ, ӀофшӀэныр зэрэзэшӀуахыгъэм уасэ фэшӀыгъэн, анахьэу анаӀэ зытырагъэтын фаехэр гъэнэфэгъэнхэ фае.
«Илъэс къэс зэхэщэн Ӏофхэм язэтегъэпсыхьан нахь зыщыдгъэушъомбгъуным, хьакӀэхэмрэ зэнэкъокъум хэлажьэхэрэмрэ яшӀошӀхэр къыдалъытэхэзэ, культурэ программэ нахь нэфэу, нахь байу зэхэтэгъэуцо, ащ ныбжь зэфэшъхьафхэм арыт цӀыфхэр дэхьахыщтых», — ытхыгъ КъумпӀылым.
Зыфэхьазырхэ зэхъум анахьэу анаӀэ зытырагъэтырэр хьакӀэхэм ящынэгъончъагъэрэ ятынчагъэрэ къызэрагъэпсыщтхэр, логистикэр, ку-уцупӀэ, мэкъэфын зэпхыныгъэхэр ары.
КӀэу къыхалъхьэрэмэ ащыщэу республикэм ипащэ къыхигъэщыгъ фестивалым итранспорт зекӀуакӀэ нахьышӀу зэрэхъугъэр. ГъэрекӀо Мыекъуапэрэ Дахъо пӀашъхьэрэ азыфагу автобуси 8 щытыгъэмэ, джы ахэм япчъагъэ 12-м нэсы.
Фестивалым имафэ зытӀущым къыкӀоцӀ зэпыщэныр Ӏоф ышӀэщт. Ар сыхьатыр 8:00-м къыщегъэжьагъэу 1Ӏ:30-м нэс Мыекъуапэ иурамэу Шосэим тет къэуцупӀэу «Восходым» къыщежьэщт, сыхьатыр 14:00-м къыщегъэжьагъэу 19:00-м нэс Дахъо пӀашъхьэм къыщежьэжьыщт, къалэм къыкӀожьыщт.
МэфэкӀым ежь-ежьырэу кӀон зымылъэкӀыщтхэм апае RUTUBE платформэм онлайн зэпхыныгъэ шъхьаӀэ щызэхащэщт.
Къыхэгъэщыгъэн фае Адыгеим икъушъхьэ чӀыпӀэу Дахъо Плъанэ итеплъэ дахэ щыкӀощт Адыгэ къуае фестивалым Урысые Федерацием ишъолъыр пстэуми, дунаим икъэралыгъохэми къарыкӀыщт хьакӀэхэмрэ зекӀохэмрэ мин пшӀы пчъагъэу къызэрэщызэӀукӀэщтхэр.
2023-рэ илъэсым щыӀэгъэ фестивалым исурэт (Адыгеим и ЛӀышъхьэ и Telegram канал).
Comments
Post a Comment