КъумпӀыл Мурат - КIокIо Казбек
Адыгэ Республикэм и ЛӀышъхьэу КъумпӀыл Мурат Къэбэртэе-Бэлъкъарым ипащэу КIокIо Казбекрэ республикэм щыпсэухэрэмрэ Къэралыгъо гъэпсыкӀэм и Мафэ фэшӀ афэгушӀозэ социальнэ хъытыухэм къащиутыгъ.
КъумпӀыл Мурат зыфигъэзагъэм къыщыхигъэщыгъ Къэбэртэе-Бэлъкъарым щыпсэурэ лъэпкъ зэфэшъхьафхэр зэрэзэкъотхэм, зэрэзэпхыгъэхэм, ащ гъэхъагъэу ышӀыхэрэм, икультурнэ ыкӀи итарихъ кӀэн зэрэрыгушхохэрэм ятамыгъэу мы мафэм мэхьанэшхо зэриӀэр.
— Адыгеим Къэбэртэе-Бэлъкъарым ныбджэгъуныгъэ зэпхыныгъэу дыриӀэм лъэшэу ыуасэ ешӀы. ТызэдыриӀэ тарихъ гъогуанэхэм, культурэ зыкӀым, илъэсишъэхэм къакӀоцӀ зэныбджэгъуныгъэмрэ зэдэлэжьэныгъэмрэ яшэн-хабзэхэм, ахэр Темыр Кавказым ыкӀи зэрэпсаоу къэралыгъом (Урысые Федерацием) мамырныгъэрэ зэгурыӀоныгъэрэ ащыгъэпытэгъэнхэм зэрэфэлажьэхэрэм ренэу тырэгушхо, — къыхигъэщыгъ Адыгеим и ЛӀышъхьэ.
Къэбэртэе-Бэлъкъарым щыпсэухэрэм КъумпӀыл Мурат афэлъэӀуагъ ячӀыгу ренэу мамырныгъэрэ зэгурыӀоныгъэрэ илъынэу, цӀыфхэм ящыӀэныгъэ гушӀуагъорэ гугъапӀэрэ хэлъынэу.
КӀэухым Адыгеим и ЛӀышъхьэ къош республикэм щыпсэухэрэм псауныгъэ пытэ, насып, щыӀэкӀэ-псэукӀэ дэгъу яӀэнэу, республикэм ыкӀи Урысые Федерацие зэрэпсаоу яшӀуагъэ къэкӀощт гухэлъхэр агъэцэкӀэнхэу афэлъэӀуагъ.
Comments
Post a Comment