Узбекистаным игрек-рим бэнэкӀо куп итренерэу Асэкъалэ Рустам (адыг) 2025-рэ илъэсым Хорватием икъэлэу Загреб щыкӀогъэ дунэе зэнэкъокъум икомандэ гъэхъэгъэшхохэр къыщишӀыгъэх.
Узбекистаным ихэшыпыкӀыгъэ командэ испортсменищ мы зэнэкъокъум медальищ къыщыдахыгъ:
дышъэ медалыр Айтжан Халмахановым (кг 63-рэ),
тыжьын медалыр Алишер Ганиевым (кг 60-рэ),
джэрз медалыр Абдулло Алиевым (кг 72-рэ) къахьыгъ.
Узбекистаным игрек-рим бэнэнымкӀэ ихэшыпыкӀыгъэ командэ итренер шъхьаӀэу Асэкъалэ Рустам щыт, 2024-рэ илъэсым ишышъхьэӀу мазэ къыщегъэжьагъэу а ӀэнатӀэр ыӀыгъ, Париж-2024-рэ Олимпиадэм ыуж спортым зыщиухыгъ.
Асэкъалэ Рустам - 1984-рэ илъэсым Новороссийскэ (Цэмэз) къыщыхъугъ. 2012-рэ илъэсым нэс Урысыем ыцӀэкӀэ зэнэкъокъухэм ахэлэжьагъ, етӀанэ Узбекистан кӀожьыгъ. 2013-рэ илъэсым Азием ичемпион хъугъэ. 2014-рэ илъэсым Азием изэнэкъокъу итыжьын медаль къыдихыгъ, Азие джэгунхэм ячемпион хъугъэ. 2015-рэ илъэсым Азием ичемпион хъугъэ, дунаим изэнэкъокъу итыжьын медаль къыдихыгъ. 2016-рэ илъэсым Рио-де-Жанейро щыкӀогъэ Олимпиадэ джэгунхэм ахэлэжьагъ, ау ащ я 8-рэ чӀыпӀэр къыщыдихыгъ. 2017-рэ илъэсым Азием изэнэкъокъу иджэрз медаль къыдихыгъ, ислъам зэкъотыныгъэм иджэгунхэм яджэрз медаль къащыдихыгъ. 2018-рэ илъэсым Азием изэнэкъокъу ыкӀи Азие джэгунхэм ятыжьын медаль къащыдихыгъ.
Олимпиадэм ыпэкӀэ дунаим изэнэкъокъуу 2019-рэ илъэсым Казахстан щыкӀуагъэм кг 87-м нэс къэзыщэчыхэрэм ащыщэу Рустам джэрзыр къыщихьыгъ, и Лъэпкъ олимпие комитет олимпие лицензие къыфихьыгъ. 2020-рэ илъэсым Токио щыкӀогъэ олимпиадэ джэгунхэм, 2024-рэ илъэсым Париж щыкӀогъэ олимпиадэ джэгунхэм ахэлэжьагъ, я 5-рэ хъугъэ (кг 97-рэ).
Comments
Post a Comment