Iоныгъом и 13 – 14-м, 2025-рэ илъэсым, Адыгэ къуаем имэфэкI Адыгэ Республикэм ит чIыпIэу Дахъо шъофым - Унэ-Iуз Iуашъхьэхэм пэблагъэу щыкIощт. Джащ фэдэу къыIуагъ Адыгэ Республикэм и ЛIышъхьэу КъумпIыл Мурат.
— Илъэс къэс фестивалым къэралыгъом ишъолъыр зэфэшъхьафхэм къарыкIырэ хьакIэхэр бэу къырещалIэх. Ащыщхэм Адыгеим Iоныгъом къэкIонхэу пэшIорыгъэшъэу агъэнафэ мы мэфэкIым къытефэнхэм пае. Ар гъомылапхъэм епхыгъэ хъугъэ-шIэгъэ закъоп – тихабзэхэм, тикультурэ ыкIи цIыфхэу тишхыныгъохэм яшIыкIэ лIэшIэгъухэм апхырызыщыхэрэм, лIэужхэм анэзыгъэсыжьхэрэм яIофшIагъэ уасэ защыфэтшIырэ хъугъэ-шIагъ, — къыIуагъ КъумпIыл Мурат.
Фестивалым къыхиубытэу гъомылэпхъэ уплъэкIуныр, лъэпкъ къэгъэлъэгъонхэр, мастер-классхэр, фермерхэм къыдагъэкIырэ шхыныгъохэм якъэгъэлъэгъон зэхащэщтых. Район зэфэшъхьафхэм щагу цIыкIухэу агъэпсыщтхэм къащагъэлъэгъощт адыгэ къое шъыпкъэр зэрипхыщтыр ыкIи ащ хэшIыкIыгъэ гъомылапхъэхэр зэрэпшIыщтхэр. Мыхэм ахэтэу концертхэр, адыгэ джэгу къашъохэр щыIэщых.
Comments
Post a Comment