ШэкIогъу мазэм икIэух мафэхэм, каратэмкIэ Дунэе ныбжьыкIэ зэнэкъокъу УФ ит къалэу Орел щыкIуагъ.
Зэнэкъокъум бэнакIо 3000-м ехъу хэлэжьагъ. Ахэр Австрием, Азербайджан, Анголэ, Казахстан, Армением, Камерун, Киргизием, Германием, Грецием, Грузием, Индием, Иран, Конго,Кубэ, Тунис, Тыркуем, нэмыкI къэралыгъохэм къарыкIыгъэх. Джащ фэдэу Урысыем ишъолъыр 83-мэ ялIыкIохэм заушэтыгъ.
Урысые Федерацием ихэшыпыкIыгъэ куп хэтыгъэх Адыгэ Республикэм щыщ БэнакIуи 4. Ахэм ягъэсакIох Владимир Васильченкэмрэ Лъэустэнджэл Амиррэ. Республикэм илIыкIохэм медалитIу къахьыгъ.
Илъэс 12 — 13 зыныбжьхэм якуп хэтыгъэ Адыгэ республикэ гимназием икIэлэеджакIоу Пако Астемир дэгъу дэдэу зыкъыгъэлъэгъуагъ, дышъэ медаль къыхьыгъ. БлэкIыгъэ илъэсым зэхащэгъэ дунэе зэнэкъокъум Астемир апэрэ чIыпIэр къыщыдихыгъагъ.
Илъэс 14 — 15 зыныбжьхэм якуп хэтыгъэ Лев Кубабшевым джэрз медаль къыфагъэшъошагъ. Ар Мыекъуапэ иеджапIэ N 19-м щеджэ.
Comments
Post a Comment