Адыгэ Республикэм Адыгэ къужъым и Мафэ Мыекъопэ шъолъырым изыгъэпсэфыпIэу псыкъечъэхыпIэхэу Сырыфыбг шышъхьэIум и 19-м щыкIуагъ. Зэхахьэм Ростов ыкIи Краснодар шъолъырхэм, Къэбэртэе-Бэлъкъар Республикэм, Адыгэ Республикэм, нэмыкI шъолъырхэм къарыкIыгъэ хьакIэхэр къекIолIагъэх.
Сырыфыбг (Руфабгъо) ипсыкъечъэхыпIэхэмкIэ бгышъхьэм узыдэкIуаекIэ къужъэе чъыгхэр хэтых. Шъоф зэикIым чъыг 20 къыщэкIы. Анахьыжъым илъэс 250-рэ ыныбжьэу зэхэщакIохэм къаIотагъ. Къужъым и Мафэ ихэгъэунэфыкIын кIэщакIо фэхъугъ Бибэ Мурат. Ар опсэуфэ лъэпкъ мэфэкIхэм язэхэщэн ишъыпкъэу пылъыгъ. Мыгъэ адыгэ къужъым и Мафэ я 12-у хагъэунэфыкIыгъ.
Сырыфыбг къызехыжьхэм Iофтхьабзэм хэлэжьагъэхэм апае мэфэкI къэгъэлъэгъон къатыгъ. ОрэдыIоу Хъурэнэ Азэ, купэу «Ошъадэр», къэшъокIо купэу «Зэрдахэр», кIэлэцIыкIу орэдыIо купэу «Лэгъупкъопс» зыфиIорэм хэтэу София Щеповскэр ащ хэлэжьагъэх.
«ХьакIэхэм къужъ зыдэлъ хьалыжъохэр апэдгъохыгъэх, шIухьафтын цIыкIухэр афэтшIыгъэх. МэфэкIым хэлажьэхэрэм ар агу къинэжьыным тыпылъ», — хигъэунэфыкIыгъ зэхэщакIохэм ащыщэу Гъыщ Заремэ.
Comments
Post a Comment