Iоныгъом и 29-м (29.09.2023), Адыгэ Республикэм ит къуаджэу Улап, апэрэу джэгокIо (хьатыякIо) фестивал щыкIощт,- джащ фэдэу къеты Адыгэ Республикэм культурэмкIэ иминистрэ.
Мы мэфэкI-зэхахьэм ишIуагъэ къэкIощт джэгуакIом мэхьанэу иIэм зыкъегъэIэтыжьыгъэнымкIэ, тарихъым, адыгэ хабзэм тетэу къыткIэхъухьэхэрэр пIугъэнхэм, адыгагъэ ахэлъыным, лъэпкъ шэн-хабзэхэр къэухъумэгъэнхэм, цIыфыгъэ шэпхъэ дахэхэм арыгъозэнхэм, адыгэ фольклорым игъэфедэн нахь зегъэушъомбгъугъэным, джэгуакIо анахь IэпэIасэхэр къыхэгъэщыгъэнхэм, лъэпкъ адыгэ музыкальнэ Iэмэ-псымэхэм къязыгъэIон зылъэкIыхэрэр гъэунэфыгъэнхэм япхыгъэ Iофхэр нахь игъэкIотыгъэу зэхащэнхэмкIэ.
Адыгэ нысэщэ джэгум къыдилъытэрэ ижъырэ хабзэхэр, «ачъэгъашъокIэ» заджэщтыгъэхэу ащыгъупшэжьыгъэр зыпкъ игъэуцожьыгъэнхэмкIэ ащ ишIуагъэ къэкIощт. ЗышIоигъо пстэуми адыгэ къашъохэм ахэлэжьэн амал яIэщт.
Мы фестивалым джэгокIо (хьатыякIо) анахь дэгъухэр, Адыгэ РеспубликэмкIэ лъэпкъ музыкальнэ Iэмэ-псымэхэм къязыгъаIохэрэр къыщызэIукIэщтых. Шъукъеблагъ.
Comments
Post a Comment